عادل الشربيني يكتب: مسرحية (الفصيح الدجال) عن قصة الدجال للدكتور كمال يونس

لوحة 1
يفتح الستار على المسرح المضاء بالكامل وبه أثاث ريفي
تدخل فاطنة (امرءة ثلاثينية) تنظر خلفها وتتحدث بلهجتها الريفية
فاطنة : منكسرة
أنا تعبت منكم
من يوم ما راجلي مات وانتوا مش، ساييني في حالي منموا لله خليتوا خياتي مرار ف مرار
أنا تعبت أوي
مش كفاية ولا سائلين في الواد اللي حيلتي
ولا كأنه من دمهم ولحمهم
حسبي الله ونعم الوكيل
ثم تجلس أرضا لتبكي بشدة
حينها يدخل الطفل فتحي صاحب العشر سنوات بملابس متواضعة وملامح مفتقدة للجمال
ليرتمي في حضنها وبدورها تقوم باحتضانه بشدة رابتة على كتفه
فتحي : ماما
عمي حسين ضربني
فاطنة : بحزن
ضربة ف قلبه
إلهي اشوفه هو وامه والعين بجاز
معلهش يا حبيبي بكره تبقى راجل وتجيب حقي وحقك منهم
فتحي : منكسرا
فين ياما المجلات اللي كنت بقرا فيهم
فاطنة: عندك في الاوضة تحت الشلتة
وبعدين سيبك م المجلات وذاكر شوية
المذاكرة هي اللي هتنفعك
يتجاهلها فتحي وينصرف تاركا والدته جالسة

إظلام
ثم بؤرة ضوء بيضاء على فاطنة

أغنية بصوت فاطنة:

يضاء المسرح بالكامل ليدخل أحد الأطفال منزعحا حيث تجلس فاطنة
الطفل : صارخا
أم فتحى أم فتحى
الحقي العيال زقلوا فتحى بالطوب وجايب دم من عينه
تنهض فاطنة مفزوعة ضاربة بيدها على صدرها
فاطنة :
يامصيبتي
الواد عينه اتصفت

إظلام
بؤرة ضوء بيضاء يظهر بداخلها الطفل فتحي موضوعا ضمادة طبية على عينه
فتحى : موجها كلامه للجمهور
انا مش عارف الناس كلها بتكرهني ليه
كل اصحابي بيكرهوني
المدرسين بيكرهوني
حتى أهلي بيكرهوني
كلهم بيتنمروا عليا
على شكلي،، على طريقة كلامي،، حتى على ثقافتي
على طول بيجرحوني وبيقللوا مني
ليه بيعملوا معايا كده
ليه يسموني فتحي الأعور
هو انا عيني لما راحت كان بمواجي
لالا هم أكيد غيرانين مني
يمكن عشان أنا احسن منهم
عشان انا مثقف وبفهم كل حاجة
وكلهم جهلة
أراهنكم لو حد فيهم يعرف الأوديسة وال... وال...
ثم يخرج ورقة من جيبه ينظر بها خلسة ثم يواصل : الألياذة (بفتح الألف)
أنا هفضل اقرا واتعلم عشان احرق كل دول
لازم يعرفوا انى احسن واحد فيهم.

إظلام

لوحة 2

باضاءة ليلية خافتة يجلس على المقهى الريفي مجموعة من الرجال بملابس ريفية وبوسطهم فتحي (رجل ثلاثيني) مرتديا ملابسا غير متناسقة بدلة فضفاضة موديل قديم مع حذاء رياضى واضعا قدم فوق الأخرى وأمامه فوق المنضدة محموعة من الكتب والجرائد
القهوجي:
تشرب إيه يا أستاذ فتحي
فتحي: اصبر يا عم الحاج شوية لسه بدري
رجل 1: مستهزءا
يا عم الفلاح الفصيح
ريح بالك م المكتبة المتنقلة اللي ماشي بيها دي
في الغيط وفي الييت والقهوة كمان
فتحي: مستنكرا
بس يا جاهل
أنا دماغي أصلا مكتبة
يضحك الجميع
فتحي :
ياجاهل منك له انا غلطان اني برد على امثالكم
امال لو قلتلكم ان الكتب دي أصلا لكتاب أجانب والعبد لله بيقراها عشان يطلع منها غلطاتهم
صحيح يا جهال لا كرامة لنبي في وطنه
رجل 2
أستغفر الله العظيم واتوب اليه
فتحى الاهور اتهبل يا رجالة بيقول على نفسه نبي
ينفعل فتحي بشدة حاملا كتبه ليهم بمغادرة المقهى قبل أن يعاود الجلوس مرة أخرى
فتحي :
لالا مش هقوم
انتوا اللى تقوموا
اوعوا تكونوا مفكرين ياد منك له ان الجهل ممكن ينتصر ع العلم الثقافة
مالكم تكأكئتم علي كتكأكئكم على ذي جنة.... افرنقعوا
افرنقعوا
ثم يقوم بدفعهم بعيدا في حين وينصرف الجميع من حوله خائفين.
يظل وحيد جالسا في خيلاء طالبا الشيشة
ثم يسترسل في زهو
لقد افرنقعوا
وأثناء ذلك يفتح أحد الكتب ويردد بعض المفردات
فتحي :
هيرمنيو طيقا
استاطيقا
سيموليجيا
بارادايم
يمر أمامه أحد الفلاحين حاملا أعواد القش ليسمع فتحي أثناء ترديد المفردات الغريبة
الفلاح : مخاطبا نفسه
يادي الحوسة ياولاد
فتحى الاعور بيقول تعويذة
إيوة إيوة
كده انا فهمت
ده مش مجنون بقى ده واصل بالعالم التانى
وما لبث أن غادر حتى يعود بصحبة شخص آخر
الفلاح :
السلام عليكم يا شيخ فتحي
فتحي:
شيخ إيه يا جاهل انت كمان
إسمي أستاذ فتحي
الفلاح:
لامؤخذه يا أستاذ فتحي يابركة
فتحي:
عاوز ايه
الفلاح : هامسا
كنت قاصدك في خدمة وحياة النبي ما تكسفني
فتحي:مستهزأ
خدمة إيه دي اللي عاوزها.
حينها يخرج الفلاح مبلغا من المال ليضعه في جيب فتحي
فتحي :متعجبا
إيه ده
الفلاح : اعتبرها هدية يا مولانا
والنبي قبل الهدية
فتحي: هدية ليه ومناسبة إيه
الفلاح: راجيا
والنبي يا شيخ فتحي ما تكسفني
أنا عارف إنك راجل بركة ودعوتك مستجابة
عاوزين حل للواد مندور اخويا
بقاله ست شهور لا راضي ينزل شغله ولا راضي يكلمنا لا حتى بيرد علينا
مع إنه شاب زي الفل ومخلص دبلون زراعة
مش عارفين ايه جراله ولا ايه اللي حصله قالب حاله كده
وربنا أرشدني عليك وقلبي حاسس ان الحل على إيدك
ووعد لو ربنا صلح الحال هديك قد اللي دفعته عشر مرات
فتحي :
حد مزعله ولا إيه؟
الفلاح:
أبدا يا مولانا مفيس بس غير اننا خايفين على مصلحته
بقاله فترة الولية هناء بنت الحاج حسين لايفة عليه وعاوزاه يتجوزها ودي ست اكبر منه ولا مؤخذة يعني
يسترسل الفلاح بصوت منخفض:
بيقولوا عليها ست مش كويسة
يعتدل فتحي في جلسته ناظرا إليها بمكر
فتحي:
لا دي سهلة خالص ماتقلقش
يلتقط فتحي قلمه وورقة صغيرة ويكتب عليها ثم يناولهاوللفلاح بعد ان يطويها أكثر من مرة
فتحى :
خد الورقة دي وحطها تحت مخدته ومستني الحاجة الحلوة
ينصرف الفلاح وأخوه ليخرج فتحي المبلغ مستكشفا إياه ناظرا إليه بفرح.

إظلام

فتحى يجلس بالمقهى في مكان مختلف
يدخل عليه الفلاح فرحا مقبلا رأسه
الفلاح:
بركاتك يا مولانا
فتحي: متعجبا
حصل ايه خير
الفلاح :
الولية اللي اسمها هناء اللي قالبة حال مندور عزلت م الدار تاني يوم ما خدنا منك البركة
بيقولوا هتتجوز وهتعيش في مصر
ثم يعود لتقبيل رأس فتحي
ثم يتجمع أهل القرية حول الشيخ فتحي محتفين بكراماته
أغنية استعراضية:

بلاك

لوحة 3
يجلس فتحي على منصة بأحد القاعات بهيئة مختلفة حيث يرتدي ملابس أنيقة ونظارة طبية غامقة تخفي عينه وأمامه مجموعة من المثقفين بإحدى قاعات الأدب وتشير لذلك اللافتة المعلقة بأعلى المنصة
يتقدم للمايك مقدم الأمسية ليقدم فتحي
المقدم:السادة الأدباء المثقفين والسيدات الأديبات المثقفات
بعد أن استمعنا إلى أعمالكم الأدبية
يسعدنا اليوم أن نستضيف الناقد الكبير الذي قضى عمره خارج مصر في تعلم الأصناف الأدبية جميعها كتابة ونقدا
الأديب الكبير ممدوح المشكور
يهز فتحي رأسه ممتنا لتفيق الحضور
فتحي:
أهلا وسهلا بكم أدباءنا الكرام
كم كنت أود آن أنقد أعمالكم عملا عملا ولكن اعذروني لكثرة انشغالاتي ومسئولياتي
ولكن ما أريد توضيحه أن النظريات الأدبية التقليدية والشكلانية والبنيوية والبيظنطية والكلاديكية والموستارية كلهم يؤكدون ان انحدار الثقافات يبدأ من حيث تختفي الكتابة البراديلية وتحل محلها أصناف تعتريها سملت تشبه لحد كبير المؤنسات والمؤنسات في اللغة لها عدة تعاريف لكي لا يتفزلك منكم فزلوكا
أما أصحاب النطريات الغير نمطية فتفكيرهم بالتأكيد به شطط يحتاج الجنوح به لبر آخر
لذا فإن أعدكم بتفصيل حديثي في لقاءات أخرى سأضحي من أجلها بثمين وقتي
تصفيق الحضور
المقدم:
سيدي الناقد الكبير برغم كلماتك القليلة التي قلتها إلا أننا استزدنا منها ومن علم سيادتكم
والآن نرجو أن تقبل تكريما بسيطا يقدمه لك أدباءنا على ما قدمتكوه للحركة الأدبية

يتقدم أحد الحاضرين يرتدي بدلة أنيقة ليقدم لفتحى درع التكريم وسط مباركات الحضور
يتقدم فتحى مخاطبا الجمهور

فتحي : يا حلااااوة
والله يا ولاد الذين خلتوني أندم على السنين اللي عشتها قبل ما افهم الفولة
الدنيا سهلة وبسيطة اهو
لما كنت طفل بريء أهلى بهدلونى وبهدلوا أمي
ولما اشتغلت فلاح بمهنتي كنت بوفر وجبتي بالعافية
ولما نصبت عليكم وسقت الفهلوة حيلتي اتغيرت بقيت أكبر كاتب ناقد ومعايا عربية آخر موديل وشقة ع النيل والبركة في المهابيل هاهاهاها
كل حياتى اتغيرت حتى اسمي غيرته ببطاقة مضروبة بكام باكو
ما الدنيا سهلة وبسيطة يا ولاد ال.،،،نشيطة
يدخل ضابط شرطة ومعه جنديان ليتوجها لفتحي الضابط:
لو سمحت هات بطاقتك
فتحي: متلجلجا
خير يا فندم فيه حاجة
الضابط :
لا دي اجراءات عادية
بطاقتك لو سمحت
فتحى: حضرتك أنا الأديب الكبير ممدوح المشكور
كلهم هنا عارفيني
حتى اسألهم
الضابط:
ماتقلقش احنا سائلين وعارفين
ثم يسترسل يا فتحي يا اعور
أغنية الفينال

تمتد