دكتور فتحي الشرقاوى يكتب: على رأي المثل

قال ياقاعدين يكفيكم شر الجايين عندما تكون جالس في حالك في أمان الله، لا بك ولا عليك وكافي غيرك شرك زي مابيقولوا.فجأه تجد أحدهم( وش المصايب)طابب عليك زي القضا المستعجل وهاتك ياموضوعات وتسخين فلان قال وعلان عمل وبيقولوا عليك..الخ كل كلامه تهييج لجهازك العصبي وتكدير لدورتك الدمويه وضغطك وسكرك وقولونك كل مهمته في الحياة إزاي يقرفك وينكد عليك عيشتك ويحول مودك من انبساط لغم وهم،فمجرد ما يقترب منك ويهمس في ودنك بكلمتين بعدها تجد نفسك عامل زي موج البحر.الهادر لاطايق نفسك ولا طايق حد جنبك وتبدأ دماغك تودي وتجيب من كُتر الغيظ، ..
أنصحك في هذه الحالة ياريت تكبر دماغك وتسقعها وتلجها وتفرزنها وقل لنفسك بينك وبين نفسك معقول واحد بالشكل ده والحجم ده والمستوى ده يغير مودي بالشكل ده ،هو أنا ضعيف للدرجة دي،مش ممكن أكون مجرد رد فعل لفعله وفكر بسرعة ازاي تقلب عليه الترابيزه وتقوله كلمتين
تسمم بيها بدنه بنفس المنطق اللي بيحركه ويدفعه من غير أعصابك متفلت منك،لاتعليه للصوت ولا تسييح ولا انفعال وغضب وكن في ردك عليه بارد كصفار البيض واقلب السحر على الساحر بحيث ينشغل بنفسه بدل ماكان جاي يشغلك إنت وخليه يشرب من نفس الكاس اللي كان عاوز يشربهولك، صدقني مرة مع التانية مش هيقرب منك تاني وعلى راي المثل طباخ السم بيدوقه
#فن إدارة الصراع#
#مجرد_خاطره

ا.د.فتحي الشرقاوي
أستاذ علم النفس جامعة عين شمس