رضوى الهوارى تكتب : احترموا مشاعر الآخرين

قصة حقيقيه حدثت لي في ابتدائي ولن انساها الي الان كنا في المدرسة بنحتفل مع مدرسة الفصل بعيد الام وكنا جايبين هدايا و كل واحد يطلع للمدرسة عند السبورة يديها الهدية وياخد بوستين ويرجع مكانه في سعادة وفجأة لقيناها بتجري علي الصف الاخير وبتحضن زميلتنا كامليا اللي كانت بتعيط جامد ... وشها احمر وعينيها حمرا والدموع والبكاء والنهنهة مش قادرة انساهم ابدا الي الان.
كامليا كانت والدتها متوفية ومستحملش الاحتفال اللي كنا عاملينه...الغريب أننا مفهمناش اصلا هي بتعيط ليه اوي كدة..وكلنا فرحانين وبعضنا استغرب ازاي والدتها اتوفت وهو صغيره كدة..وبعضنا مكنش يعرف يعني ايه موت اصلا. صدقوني شئ مؤلم جدا انك ماتحسش بمشاعر غيرك
عيد الام مؤلم زي أعياد كتير بنعملها من غير ما نراعي المحرومين منها...ياريت نخلي بالنا من كل "كامليا" بتتٱلم واحنا بنحتفل بهستيريا ونراعي مشاعر بعض و نفتكر أن منع الدموع اهم من رسم البسمة.وعلي فكرة مازلت كامليا صديقتي الي الان وكانت تحتفل معي بأمي رحمة الله عليها