الدكتورة مارى جرجس رمزى تكتب : التحرش ونظرية ( ام كلالة )

إيه رايكم نتكلم شوية عن حوار التحرش ده بعد ما الزفة خلصت والحدوتة هبطت والناس اتهدت؟

الأول بس اسمحولي اخدكم معايا في مشوار كده صغير
لما بنوتي الصغيرة كانت ف الحضانة بمجرد آخر حصة تخلص ويجي وقت المراويح كل عيل م العيال كان لازم حد من اهله يجي يستلمه م الفصل ويمضي ع استلامه... وعلشان كده كتير م الاهالي كانت بتتأخر عليهم شوية لأنهم ضامنين إن العيال جوه الفصل وتحت إشراف ومسؤولية مَدرسة محترمة ومستحيل عيل هيفلِت ويطلع م الفصل حتى العيل المزنوق بيطلع الحمام مع الدادة ويرجع ف ايدها يقعد ف تختته
وبناء عليه
العيال آخر اليوم بيبقوا طهقوا... اللي جاع واللي بيهرش م العرق واللي نعس والمُدَرِسة رَوَّحت وسابتهم مع الدادة لحد كل عيل ما يجي حد يستلمه
قوم ايه...
العيال تهيج ع بعض وكل عيل ينزل دعك ف العيل اللي قرفان منه ويعدمه العافية ضرب
وكل بت قرفانة من زميلتها تنكشها وتجر شَكَلها لحد ما يتطور الموضوع ويتحول الي عركة بالإيدين او شلاليت وعض
قوم ايه....

قوم ايه....
الدادة الغلبانة_ و اللي برضو طالع ميتينها طول اليوم_ تلاقي نفسها رايحة ف داهية وسط الدواعش دول وعادة بتكون الدادة تخينة بصورة ملفتة للنظر ومفهاش حيل تحَلَّق ع العيال وتفك عراكهم
قوم ايه...
تِشَّغَّل دماغها الالماظات اللي مااتهدتش بالكيمياء والفيزيا والفلسفة ونظريات الوجودية وفلسفات العصور الرومانية والإغريقية وعلم مقارنة الاديان.... وتشد الجردل الصفيح اللي بِتسيَّق بيه الفصل كل يوم بعد ما العيال ترَوَّح في حركة لولبية متمكنة وهي قاعدة زي ما هي ع الارض قدامهم مستقرة الأركان ثابتة الجوانب كالجبال الرواسي وتبدأ تطبل بمهارة تفوق الطبلجي اللي كان بيبقى واقف ورا الراقصة المخضرمة نجوى فؤاد في عزها وتنطلق منها زغرودة تلو زغرودة متخللة أشهر أغنية كانت مكسرة الدنيا وقتها وهي أغنية ام كلالة ولدت

وفي لمح البصر _وكأنها ألقت عليهم تعويذة سحرية مجهولة او نيمتهم نوم مغناطيسي_ العيال كلهم و بدون استثناء ذكور قبل إناث يفكوا إيدهم من بعض ويدخلوا في نوبة استثنائية من الرقص الشرقي والزغاريد والغناء من غير أي مناسبة ولا سابق إنذار وبدل ما كانوا هيشَرَّحُوا بعض اتقلبت الليلة فرح وعيد ميلاد وطهور في آن واحد والجميع في سعادة وتبات ونبات يغنون ( ام كلالة ولدت ياللا نروحلها)
طيب...
إيه لزمة اللي بقولو ده؟ وإيه علاقته اصلاً بموضوع التحرش
ده اللي هكمله معاكم اذا كان ف العمر بقية