الدكتورة مارى جرجس رمزى تكتب : # جتكم القرف من وسع ..(جمهورية البط) (13)

"وبعد ما بطة الشرشيني غسلت دماغ الستات...
وعلمت كل واحدة ترد الكلمة بعشر كلمات...
وكل واحدة تحط راسها برأس جوزها ف كل الاوقات...
ونص نسوان جمهورية البط خدوا بسببها لقب مطلقات...
لقيتلك الست المصون حرمنا اخدت منعطف جديد ف الطلعات...

مش بس قاعدالي اليوم كله لطموحها واحلامها... ورامية بيتها وعيالها...
لا ده حتى اللقمة اللي هناكلها مبقتش لدقيقة لقيالها...
العيال طول النهار ف الشارع ماحدش داري بحالها...

خلصوا مدرسة امتي؟ اتغدوا فين؟ راحوا عند مين؟ مفيش.. متلاقي...
ولو جيت ف مرة اعاتب او اتكلم تقولي شيل مسؤلية معايا ومتلومنيش...
طيب يا ستنا بذمتك ده دور مين؟.. الاب المطحون ف شغله عشان ولاده تتعلم وتعيش...
واللا الأم اللي وظيفتها الاساسية تربية عيالها قوليلي ومتخبيش؟...

كل ده اتحملته واضربي ف الف مَرة...
عشت عيشة ملهاش ملامح بهتانة و باردة ومُرة...
عز وجاه ومال وفلوس وعيال كل ده هالا هالا من بره...
لكن لحظة راحة بال ف عشرتها واللاه ما دوقتها ولا عشت فيها ذرة...
وقلت لنفسي يا واد استحمل العيال بتكبر هانت كَمِل رسالتك بالمرة

واستحملت وبقيت على اد ماقدر اب وام...
اسأل ع ده واتابع ده علشان اسيب الهانم لدنيتها تهتم...
لحد ما جه اليوم اللي مطلعتلوش شمس واكتشفت ان ابني الكبير مدمن!! شفتي المصيبة والهم والغم...

لقيت الدنيا كلها حواليا بتنهار ف ثانية...
اتمنيت ثروتي تروح بعد ما اتأكد انها فانية...
او سنين العمر ترجع وتديني فرصة تانية...

اول حاجة عملتها اني سافرت بعيد انا وولادي...
ماخلاص ضهري اتقطم وميبقاش فيا حيل اعاتب وادادي...
الحاجة اللي استحملت عشانها المر لبست عليها سوادي وحدادي...
ولادي... فلذات اكبادي....بقوا هما بسبب ام فاشلة سر حرقة فؤادي...
بعتلها ورقة طلاقها من بلد بعيد جدا عن بلادي...

ولما رجعت بعد شهور اخلص اللي باقي من حالي... وارجع لعيالي... لقيتها لكمين عملالي... ومستنيه هيا وشوية من أهلها الصيع وكانوا هيموتوني ف ايدهم غيرش ناس ولاد حلال دلونا ع بيتك نجيلك وحكمك يمشي عليا وعليها حتي وهي طليقتي ومش حلالي...

مين الغلطان يا ستنا قولي كلمتك تمشي ع رقبتنا كلنا... لو انا ظالمها ارجها واحنا واقفين هنا...

(تعالي يا بدارة اقعدي جنبي...
كنتي فاكرة يختي ان دنيتك راح تبقى بمبي...
شبعة من بعد جوعة وعنيكي بجحة ما تعرف تقول سامحوني ده ذنبي...

طالعة من بيت كنتي بتكملي عشاكي فيه نوم...
الفقر عمره ما كان عيب بس اللي مايربي هو اللي عليه اللوم...
وانتي لا اتربيتي ولا ربيتي ولا لقيتي حد يقولك اتلمي يا عيب الشوم...

عارفة يا بت لما هتقفي بين ايد خالقك هيحاسبك ع انهي حسابات...
مش هيبص ف دفاترك وحسابك ف البنك والعربية والفيلات...
واللا علبة الصيغة بتاعتك او شوية السوليتيرات...
الا ما نفعوكي ف دنيتك يا هبلة تفتكري بعقلك الزنخ ده هينفعوكي ف النهايات...
افتحلي بقي ودانك كويس يا خيبتهم واسمعي اللي هقوله
واللي كان المفروض تسمعيه من زمن فات...

يتبع...
الخميس من كل اسبوع
بقلمي
دكتورة ماري جرجس رمزي