ايهاب وهبي يكتب:مانا اصلي منها ...

عايش فيها حلوها مرها انا بردو منها .. تسرقوها تنهبوها تطلعو عين ابوها بردو منها . سيبك من الهري واللمز والهمس وشم ريحة  شوارعاها المحنيه . هتقولي زبلوها كسروها بمطباتها بردو احنا منها .. دولار ايه يا سيدنا وجوع وفقر وغلابه واطفال شوارع  مش مهم بردو منها . مش مهم كنا ايه ولا هنبقي ايه خلينا في افكار رجالتها اللي ماسكنها .. مش هما بردو اللي خرجو الملك وعيروه بخيبته وقالو ان مصر لاهلها وانه خاين وصدقنا علشان احنا بردو منها ... طيب انا صابر وسميت ابني صابر وماشي فيها صابر بس ليه علشان انا منها ... ماشي ياسيدي هاسمعك وافضل اسمعك وازيط ويا اللي زايطين مهو كلنا منها ... قاعدين علي القهوة في شوارعها طوووول الليل مهو اتحكم علينا ننسي ونعيش وهي لقمه هنية تكفي مايه .. روح  الصبح  أمضي وروح نااااام ماحنا بردو منها ... قالو البلد بلدنا انا قلت لأ اصبر مش كلنا بس انا بردو منها .. اصل اللي عارفين كل حاجه قلولنا لازم يكون في طبقه كادحه وطبقة سفنج وطبقة حرير بس الكل منها ... متخفش يا ابني مستقبلك مش هيخرج عن انك  هتبقي بردو يا ابني  منها ... تسافر ايه بتقول ايه عاوز تسيبها وتسيب طفولتك واحلامك اللي ادفنت في ارضها نزعل كده منك ... هنحافظ عليكي علشان تموت علي ارضها يا ابني  اللي انتي منها .. اضحك بصوت عالي او ابكي بس بردو مش هينفع تغير انك بردو منها .. طيب وبعدين عيب متقلش ليه وازاي وامتي واستني علشان الناس اللي منها محضرين ليك مفاجأه كبيره علشان تبقي اد الدنيا .. مش هما قالو كده بردو لازم تصدق وتقفل بقوك ولو تقدر تقطع لسانك اقطعه وانت مبسوط انك لسه يا ابني منها .. احسن ما تبقي خاين وعميل وتطرد من رحمة  المنظومه اللي مخلياك لسه منها .. بقولك كلام صدقه مهما حاولت وزعلت وعملت ابو عرام بردو مش هتخرج عن انك يا ابني محجوزلك انك تكون بردو منها .. مانا اصلي منها عارفها ودستوها براها  وعايش معاها عمرها وعمري اللي راح علشان ابقي منها ...  ما نا قولتلك انا اصلي منها .