ميلاد يونان يكتب: المالك والمستأجر... مودة لا تقطعها القوانين

أنا مستأجر ومسن... مشكلتي مش مع الملاك، دول أهل وجيران عُمر‎.
مشكلتي مع حكومة قررت تحوّل قانون الإيجار القديم إلى مسرحية عبثية، والمستأجرين إلى أرقام تُشطب بلا رحمة‎.‎
إحنا مش طالبين معجزة، بس شوية عقل... شوية رحمة... وشوية مسؤولية‎.
نفسنا نشوف حل ينزع فتيل الفتنة، مش يشعلها‎.
لأن بيننا وبين المالك عِشرة، ومودة، وعيش وملح‎...
مش محتاجين قانون يفرّق، بل عقل يوصل‎.‎
________________________________________
فبالرغم من إني مستأجر... لكن الحقيقة؟ عمري ما حسّيت لحظة إني "غريب" في البيت اللي ساكن فيه‎.
سكنت في شقة صغيرة داخل عمارة يملكها رجل فاضل، كبير سن ومقام، يحترمه الجميع، ويعرفونه باسم "الأخ مؤمن‎".
من أول يوم، استقبلني بابتسامة دافئة وقال من "دلوقتي المكان مكانك" : "المكان نور بأهله‏‎".
ومن ساعتها، الشقة ما بقيتش مجرد عنوان… بقت "بيتي‎".‎
كبر أولادي جنب أولاده، دخلوا نفس المدارس، لعبوا على نفس السلم، واتبادلنا الهدايا في الأعياد، والضحك في المناسبات‎.
عمره ما طلب مني حاجة تعجيزية، وعمري ما اتأخرت عنه في الإيجار‎.
ولو حصل عطل في السلم أو المدخل، كنا نتسابق، بمحبة، مين يدفع أول‎.
العلاقة ما كانتش مجرد عقد، بل كانت عشرة، ومودة، وجيرة حقيقية... أغلى من أي ورقة مكتوبة‎.‎
________________________________________
ولما "توفي" الأخ مؤمن، حسّيت بحسرة، وإني فقدت أخ‎.
محدّش في العزاء قال: "مالك البيت توفّى‎".
لكن قالوا ببساطة توجع القلب: "أخوكم الكبير في العِشرة مات‎".
فاهمين الفرق؟‎
مش "أخويا في القانون"... لأأأ!! كان أخويا في العِشرة، في اللقمة اللي اتقسمت، وفي السنين اللي اتعاشت بمحبة وأدب واحترام‎.‎
________________________________________
علشان كده، لما بشوف أولاده، بفرح لأنني بشوفهم زي ولادي‎.
ولما بيشوفوني، ببهجة يقولوا: "عمنا فلان"، مش "المستأجر اللي لسه قاعد؟‎".‎
والنهاردة؟ للأسف‎!
بشوف مشهد غريب ومؤلم‎...
ناس من الملاك بيشتموا المستأجرين‎.
وناس من المستأجرين بيقللوا من الملاك‎.
نسوا العيش والملح، ونسوا العِشرة، ونسوا إننا كنا – ولسه ممكن نكون – أهل وأحبة‎!
العلاقة بين المالك والمستأجر مش معركة‎.
دي علاقة قانون وأخلاق وإنسانية... وأدب‎.‎
________________________________________
ولازم نرجع للمعنى ده‎.
التغيير مش غلط، لكن الأهم إننا ماننساش العِشرة الطيبة اللي جمعت بينا زمان‎.
أنا مش ضد التغيير... لكن ضد قسوة اللسان، وضد إننا ننسى المعروف اللي كان‎.
وننسى عشرة جمعت قلوبنا، قبل ما تجمعنا الجدران‎.‎
ختام : اجعلوا هذه الكلمات دعوة لإعادة النظر في العلاقات الإنسانية بين الملاك والمستأجرين، وفي أهمية تعبيرنا عن أنفسنا بعيدًا ‏عن القسوة، والتمسك بالقيم التي تجمعنا بدلًا من الفرقة
________________________________________ـــــ ناشط حقوقي ـــــ